افغانستان:په اسلام کلا کې راستنیدونکو لپاره اړینو بیړنیو خدماتو ته لاسرسی ډاډمن کول

کابل، افغانستان: د اپریل له لومړۍ نیټې څخه تر ۳۰مې پورې، له ۲۵۰ زره څخه ډیر افغانان له پاکستان او ایران څخه هیواد ته راستانه شوي، چې شاوخوا ۱۰۷زره یې په جبري توګه رایستل شوي دي.

 د افغانستان سره په دواړو لویو پولو کې یو کړکیچ روان دی. افغانستان ته راستنیدونکي وګړي پداسې حال کې راستنیږي چې ستړي، ویریدلي او صدمه لیدلي دي، او په یو داسې هیواد کې له نامعلوم راتلونکي سره مخ دي چیرې چې ۲۲.۹ میلیونه خلک د خپلو لومړنیو اړتیاوو د پوره کولو لپاره په بشري مرستو تکیه کوي. د بې وزلۍ او خوراکي ناخوندیتوب د لوړې کچې او د سرپناه نشتوالي سربیره، دا راستنیدونکي له بیلابیلو روغتیایی ستونزو سره لاس او ګریوان دي.

صدمه یا ټراما، خوارځواکي، ساري ناروغۍ لکه شدید اسهالات، حاد تنفسي انتانات او همدارنګه د رواني روغتیا ستونزې، هغه روغتیايي موارد دي چې د راستنیدونکو ترمنځ ډیرې راپور شوې دي.

د روغتیا نړیوال سازمان ایران سره په پوله د اسلام کلا په صفري نقطه کې د نورو بشري شریکانو سره یوځای راستنیدونکو ته حیاتي روغتیایی پاملرنه چمتو کوي. په اپریل میاشت کې، نږدې ۴،۵۰۰ کسانو د روغتیا نړیوال سازمان له لوري ملاتړ کیدونکي صحي مرکز کې خارج بستر روغتیايي مشورې ترلاسه کړې، چې شاوخوا ۱،۴۰۰ هغو یې وړیا درمل ترلاسه کړل. همداراز شاوخوا ۲۶ زره کسانو ته روغتیایی زده کړې هم ورکړل شوې.

سربیره پردې، په اسلام کلا کې د روغتیا نړیوال سازمان  په ملاتړ د څارنې ټیم (SST) په اپریل په میاشت کې شاوخوا ۱۰۵ زره کسان (بیرته راستنیدونکي او عادي مسافر) معاینه کړي. د څارنې ټیم له لوري په معایناتو (سکرینینګ) کې د تودوخې معاینه، د ساري ناروغیو نښې نښانې پیژندل او د شکمنو COVID-19 او نورو ساري ناروغیو قضیو راجع کول شامل دي. د دې ترڅنګ شپږ نارینه او ښځینه واکسیناتوران د اسلام کلا په صفري نقطه کې ګمارل شوي ترڅو راستنیدونکو ته د پولیو واکسین خدمات وړاندې کړي.

په اسلام کلا کې د روغتیا نړیوال سازمان لخوا د ملاتړ شوي صحي مرکز مشر ډاکټر نور احمد محمدي وايي: "زموږ د ټیم غړي د هغو ناروغانو درملنه کوي چې کوچني صدمات یې لیدلي او ناروغانو ته خارج بستر صحي مشورې وړاندې کوي. ددې ترڅنګ بیرته راستنیدونکو ته روغتیايي زده کړې چمتو کوي." نوموړی زیاتوي چې، "په منځني ډول، هره ورځ شاوخوا ۲۰۰ خلک زموږ کلینیک ته راځي، اړین روغتیایي خدمات او درمل ترلاسه کوي. "

دا مرکز د هغو راستنیدونکو لپاره د اړیکې لومړۍ نقطه ده چې بیړنۍ روغتیايي ستونزې لري او د اړینو بیړنیو خدماتو چمتو کول ډاډمن کوي.

د یادو خدمتونو په اړه له ایران څخه راستنیدونکی یو تن محمد رضا وايي: "زه ډیر سرګردانه او تږی وم. نږدې په لاره کې بې هوښه شوی وم. زما ملګرو سمدلاسه زه د استقبال مرکز کې کلینیک ته بوتلم. ډاکټرانو زما د وینې فشار معاینه کړ او ډاډ یې راکړ چې هرڅه به سم شي. دوی د وینې ځینې معاینات وکړل او ما ته یې درمل راکړل."

هغه زیاته کړه: "کارمندانو ډیر ښه چلن درلود او زما هرکلی یې وکړ. زه د دوی او هغو کسانو څخه ډیره مننه کوم چې د دې مرکز ملاتړ یې کړی."

افغانستان کې د روغتیا نړیوال سازمان استازی او د ماموریت مشر ډاکټر اډوین سینیزا سلواډور وايي راستنیدونکو ته د صحي خدمتونو د وړاندې کولو په موخه پروخت مرستې اړینې دي. ډاکټر سلواډور پدې اړه وايي: "له پروخت مرستې پرته، په ځانګړي توګه په راتلونکو میاشتو کې د راستنیدونکو په راتګ کې ممکن زیاتوالي ته په پام سره‎، د دې ژوند ژغورونکو خدماتو دوام له خطر سره مخ دی."

"د تمویل د سخت کمښت په لړ کې، اضافي نړیوالې مرستې ته اړتیا ده ترڅو د میرمنو او ماشومانو لپاره چې په خطر کې دي، خورا اړین روغتیایی خدمات او ځانګړی ملاتړ چمتو شي."